Համապատասխան մասնագետների ներգրավումը դպրոց : Բազմամասնագիտական թիմ

 Դեպքը պահանջում է մի շարք մասնագետների համագործակցային մասնակցություն՝ աշակերտին աջակցելու նպատակով: Այսպիսի համագործակցությունը կոչվում է թիմային աշխատանք: Թիմով աշխատանքը հնարավորություն է տալիս ամենա տարբեր տեսակետներից դիտարկել և ուսումնասիրել աշակերտի վիճակը՝ հավաքելով առավել համակարգված և ամբողջական տեղեկություններ:

    Թիմի անդամները ստանձնում են դեպքի վարման հետ կապված պատասխանատվություններ՝ համաձայն իրենց մասնագիտության. օրինակ՝ հատուկ մանկավարժը, հոգեբանը, սոցիալական աշխատողը, ծնողը, ուսուցիչը: Թիմի կարևոր անդամ է հանդիսանում երեխան և նրա  ընտանիքը: Թիմը մարդկանց մեխանիկական հանրագումար չէ:  Թիմը  կազմում է մի միավոր, որն ավելի մեծ է, քան այդ միավորի յուրաքանչյուր անդամների գումարը: Սա նշանակում է, որ թիմի անդամները պետք է սերտորեն աշխատեն միմյանց հետ և իրենց ջանքերն ուղղեն  առաջադրված խնդիրների լուծմանը:

   Թիմի հիմնական նպատակն է  երեխային տալ հնարավորություն` օգտագործել իր ֆիզիկական, մտավոր, էմոցիոնալ հնարավորությունները, աշխատանքային ողջ կարողությունները` շրջապատում որքան հնարավոր է ինքնուրույն հանդես գալու համար: 

Արդյունավետ թիմի ստեղծման համար  չորս  նախապայման

1.Թիմի անդամները պետք է բնական պատճառ ունենան միասին աշխատելու համար: Արհեստականորեն հավաքագրված թիմում չի ստեղծվի թիմային աշխատանքի համար անհրաժեշտ ոգին:

2.Թիմի անդամները պետք է փոխադարձ պատասխանատվություն կրեն կատարված աշխատանքների համար: Դրա բացակայությունը նվազեցնում է նվիրվածությունը:

3.Թիմի անդամները պետք է հավասար կարգավիճակ ունենան: Թիմի անդամների ոչ հավասար կարգավիճակը չի նպաստում վստահության և փոխկապվածության ամրապնդմանը:

4.Թիմում հաղորդակցությունը պետք է ազատ լինի, քանզի երեխայի հիմնախնդիրների լուծմանն ուղղված գործողությունների հաջողությունները կախված են նրանից, թե որքանո՞վ է արդյունավետ հաղորդակցությունը թիմի անդամների միջև:

Թիմային  աշխատանքի կանոնակարգ

• Թիմի մասնագետները երեխայի հետ հանդիպումները կազմակերպում են նախապես մշակած  անհատական ծրագրի համաձայն:
• Թիմի  մասնագետները առնվազն երկու շաբաթը մեկ անգամ կազմակերպում են թիմային քննարկում:
• Մասնագետի և երեխայի հանդիպումը չի կարող ընդմիջվել առանց հատուկ անհրաժեշտության:
• Թիմի բոլոր մասնագետները իրենց հերթական հանդիպումների մասին  գրանցումները պարտավոր են կատարել  օրագրերում:
•  Անհրաժեշտության դեպքերում հրավիրվում են արտահերթ քննարկումներ:
•  Երեխայի փաստաթղթերի հետ աշխատանքից հետո դրանք պետք է անմիջապես տեղավորվեն  համապատասխան փաթեթներում (երեխայի գործը):
• Սահմանված ժամկետներում ներկայացնել աշխատանքի վերաբերյալ հաշվետվություն:

Թիմում աշխատելու վարքագծի հիմնական կանոնները.

Ø  այլոց գաղափարների ընդունում,

Ø  օժանդակության տրամադրում, չսպասելով  այդ օժանդակությունը  տրամադրելու խնդրանքին ,

Ø  առաջարկությունների ընդունում,

Ø  խորհրդատվություն և օժանդակություն առաջարկելուց առաջ թիմի անդամների նկատառումների, կարիքների, հմտությունների հաշվի առնում,

Ø  հիմնախնդիրները լուծելու համար համագործություն թիմի այլ անդամների հետ:

        
Մասնագետներին ներկայացվող պահանջներ.

•   Մասնագիտական կոմպետենտություն:
•  Իրազեկվածություն առկա ծառայությունների մասին:
•  Երեխաների և ընտանիքների հետ աշխատելու/շփվելու հմտություններ:
• Խմբի մյուս մասնագետների հետ առողջ համագործակցելու հմտություն: